Адно са святых месцаў Беларусі – Нацыянальны Санктуарый Маці Божай Будслаўскай – наведала у пачатку мая наша катэдральная моладзь. На тры дні гэтае месца стала для нас месцам малітвы і працы. Група з 25 чалавек прымала ўдзел у рэкалекцыях, арганізаваных кс. Віталіем Драздоўскім – адказным за душпастэрства моладзі Мінска-Магілёўскай архідыяцэзіі, і с.Сафіяй Голуб – кіраўніком нашага моладзевага хора “Gloria”. Тэма рэкалекцый – разважанні аб Святым Духу – асобе трыадзінага Бога.

У нядзелю, ва ўрачыстасць Найсвяцейшай Тройцы у нашай парафіі адбылося свята першай Святой Камуніі ў дзетак, якія на працягу двух гадоў рыхтаваліся да гэтай незвычайнай для іх падзеі.  

У суботу, 10 мая, у вігілію ўрачыстасці Спаслання Духа Святога у нашай парафіі адбылася вельмі радасная і прыгожая падзея - сакрамэнт шлюбу прынялі Павел і Ксенія Рак. Гэтая маладая пара вядомая ў парафіяльнай супольнасці сваім актыўным удзелам у жыціі парафіі і яскравым прыкладам сапраўднага хрысціянскага жыцця.  

У суботу 26 красавіка 2008 г., у 22-ю гадавіну аварыі на Чарнобыльскай АЭС, Арцыбіскуп Тадэвуш Кандрусевіч Мітрапаліт Мінска-Магілёўскі падчас святой Імшы ў 18.30 у мінскім архікатэдральным касцёле маліўся ў інтэнцыі ахвяраў катастрофы ў Чарнобылі.

Шаноўная моладзь, студэнты! З 10 красавіка 2008 года змяняецца расклад моладзевай святой Імшы.  Святая Імша для моладзі будзе цэлебравацца ў чацвер а 18:30! Таксама шчыра заахвочваем вас прымаць удзел у моладзевых спатканнях, якія будуць мець мейсца пасля святой Імшы і будуць праводзіцца ў выглядзе біблійных разважанняў у групах. Першае такое спатканне адбылося у чацвер 10 красавіка і пакінула шмат прыемных уражанняў. Праводзіць спатканні будуць кс. Віталій Драздоўскі і кс. Юры Санько. Сардэчна запрашаем далучацца і разам пазнаваць Святое Пісанне, тым больш што 2008 год аб'яўлены ў Касцёле - годам Божага Слова. 
Завяршацца сустрэчы будуць у касцёле супольнай адарацыяй Найсвяцейшага Сакрамэнту.

Шаноўныя сябры нашай інтэрнэт старонкі! Ад усяго сэрца віншуем Вас з надыйшоўшым найвялікшым святам хрысціянства- Уваскрасеннем Хрыстовым! У гэтыя светлыя дні  жадаем Вам як найглыбей прыблізіцца да разумення і асэнсавання неспасцігальнай таямніцы Пасхі, якая з'яўляецца цэнтрам нашай веры, каб  яшчэ больш умацавацца духоўна і дзяліцца радасцю пазнання Хрыста з бліжнімі. ХРЫСТОС УВАСКРОС! САПРАЎДЫ ЎВАСКРОС!

Кс. Пробашч  Антоні Клімантовіч